新太陽眼鏡

今日既工作就更係執行李啦～雖然尋都執得七七八八，但係去咁多日喎～更係要執得小心啲清楚啲啦～ 執行李之前，當然係要醫飽個肚先啦～ 所以同B仔落咗街食早餐，食食下早餐，B仔同我講不如送副太陽眼鏡比我去旅行用。嘩！我更係話好啦～！其實我咁大個女都冇一副真真正正屬於自己既太陽眼鏡架～！最後去咗眼鏡88，攪咗一輪，最後買咗一副Armani既太陽眼鏡，多謝你呀B仔！！

為渡蜜月做準備

今日真係要去唱錢啦～高位就高位啦，都冇計，因為係最後chance啦～


由於去唱錢既闗係，我同B仔順便攞埋啲金器放入保險箱，原來個保險箱都真係唔係好大，放晒啲金器入去之後，都有乜位剩，有啲金器仲要寄養喺另一個盒度，同人share…

去完十字銀行之後，又要去元祖銀行。梗係啦～咁多人情喎，梗係要入晒入銀行先至去旅行啦～萬一去旅行中途屋企比人爆格都唔會渣都無吖嘛～！


之後，我哋去埋吉之島買喼，揀咗一輪，最後買咗 Elle既大喼，同埋一個可以穩陣咁放喺喼上面既細袋，多謝盛惠$1xxx大元。

＊第一日做師奶＊

雖然尋晚最後成三點幾四點先瞓，唔好諗衰嘢呀～只不過係同啲兄弟傾計傾夜咗咋。不過，都今朝九點幾就起咗身，因為有酒店既早餐食吖嘛，所以特別醒神！！

食完一個超醒神既早餐之後（真係好好味架yummy!），當然係去物歸原主啦～ 好彩有阿柚幫手，如果唔係，都唔知點算，呢次真係唔該晒阿柚呀～～！

由今日開始我就人哋太太啦～不過，其實都真係唔係好慣人哋叫我做咩太咩太。